ޖިހާދުގައި ޢަމަލީގޮތުން ބައިވެރިވެލެއްވުން

ޝެއިޚް ޔޫސުފް އަލް-ޢުޔައިރީ (رحمه الله) މެދުމަދަރުސީ ތަޢުލީމް ޙާޞިލްކޮށް، ޘާނަވީ ތަޢުލީމުގައި ދުވަސްކޮޅެއް ހޭދަކުރުމަށްފަހު، އުމުރުން 18 އަހަރަށްވުރެ އިތުރުވެ ނުދަނީސް، ޘާބިތު ޒުވާނެއްގެ ގޮތުގައި އަފްޣާނިސްތާނަށް ވަޑައިގެންނެވިއެވެ. އެހިނދުން ފެށިގެން، ޖިހާދުގެ ލޯބި ޝައިޚުގެ ހިތުގައި އުފެދިގެންދިޔައެވެ.

ﷲގެ ރަޙްމަތުން، ޝައިޚަށް ޙިކުމަތްތެރި، ވިސްނުންތެރި އަދި ހިތުދަސްކުރުމުގެ ބާރު ލިބިގެންވާ ސިކުނޑިއެއްދެއްވިއެވެ. އަދި ސޯވިއެޓުންނާއި ދެކޮޅަށް އެންމެ ފުރަތަމަ އަފްޣާނިސްތާނުގައި ކުރެވުނު ޖިހާދުގެ ޢަސްކަރީ ތަމްރީނުދޭ މަރުކަޒެއްކަމުގައިވާ އަލް-ފާރޫޤު ޢަސްކަރީ މަރުކަޒުގައި ތަދްރީބުކޮށްދެއްވާ ބޭކަލެއްކަމުގައި ވެވަޑައިގަތެވެ. އެގޮތުގައި އިޚްލާޞްތެރިކަމާއި ޢަޒުމާއިއެކު އެތައް އަހަރުތަކެއްވަންދެން ހުންނެވިއެވެ.

ހަތިޔާރުތަކުގެ ފުރިހަމަ ތަފްޞީލުތަކާއިއެކު ހިތުދަސްކޮށްލުމުގެ ބާރު ޝައިޚަށް ﷲ މިންވަރުކޮށްދެއްވިއެވެ. އަދި އެމައިދާންތަކެއްގައި ޝައިޚުގެ ފައި ހިރަފުހުގައި ބީހުމުގެ މަތިވެރިކަން ﷲ ދެއްވިހިނދު، ޢަދުއްވުންގެ ކުރިމަތިލުންތަކުގެ ބުރައުނދަގޫތަކާއި ކުރިމަތިލެއްވީ ކެތްތެރިކަމާއިއެކުއެވެ.

ޝައިޚް އުސާމާ ބިން ލާދިން (حفظه الله) ސޫދާންގައި ހުންނެވިއިރު، ޝައިޚް އުސާމާގެ ބޮޑީގާޑެއްގެ ގޮތުގައިވެސް ޝައިޚް ޔޫސުފް (رحمه الله) ވަނީ މަސައްކަތްކުރައްވާފައެވެ. އަދި ޝައިޚް ޔޫސުފްގެ ވިސްނުންފުޅު ތޫނުކަން އެނގިވަޑައިގަތުމާއިއެކު، ޝައިޚް އުސާމާ ކުރިމަތިލައްވަމުންދިޔަ ބައެއް ކަންތައްތައް ހިއްސާކުރެއްވިއެވެ. އަދި ޝައިޚް ޔޫސުފް ވިދާޅުވިގޮތުގައި، ޝެއިޚް އުސާމާ ބިން ލާދިން ސޫދާންގައި ހުންނެވިއިރު، ދިރިއުޅުއްވުން ބެހެއްޓެވިގޮތާއި ކުރެއްވި ޞަދަޤާތްތަކާއި ބެހޭގޮތުން އަޑުއިވިއްޖެނަމަ، މީހަކު ޢަޖައިބުވާނެއެވެ.

ގިނަ ޒުވާނުންތައް އުއްމަތުގެ ޙާލަތާއިމެދު ހަނދާންނެތިވެފައި ވަނިކޮށް، އެމެރިކާނުން ބަލިކޮށް ފައްސާލުމުގައި އެމީހުންނާ ދެކޮޅަށް ސޯމާލިއާގައި ކުރިއަށްދިޔަ ކުރިމަތިލުންތަކުގައި ޝައިޚް ޔޫސުފް ޢަމަލީގޮތުން ބައިވެރިވެވަޑައިގެންނެވިއެވެ. އަދި އޭގެފަހުން ޢަރަބި ޖަޒީރާއަށް ވަޑައިގެން، އެއިރުގެ މަޝްހޫރު ޢިލްމުވެރިންނާ ބައްދަލުކުރެއްވިއެވެ. އޭގެތެރޭގައި ސަލްމާނުލް ޢަޥްދާ ހިމެނެއެވެ. ޝައިޚް އުސާމާ ބިން ލާދިންގެ ހަނގުރާމަވެރިއެއްގެ ގޮތުގައި ވުމަށް ވަރަށްބޮޑަށް އުފާކުރާކަމުގައި، ޝެއިޚް ސަލްމާން ވިދާޅުކަމަށް، ޝައިޚް ޔޫސުފް ވިދާޅުވިއެވެ.

ބޮސްނިއާގެ ޙާދިސާފެށުމާއިއެކު، ޢަރަބި ޖަޒީރާގެ ދައްމާމް އޭ ކިޔުނު ސަރަޙައްދުގައި ތިބި އަޚުންގެ ގާތުގައި މުހިއްމު ޝަޚްޞިއްޔަތެއްގެ ގޮތުގައި ހުންނެވިއެވެ. އަދި ކޮސޯވޯގެ ހަނގުރާމާގައި، އެތަނަށް ފައިސާގެ ގޮތުންނާ އެހެނިހެން ގޮތްގޮތުން އެހީތެރިކަން ފޯރުކޮށްދެއްވިއެވެ. އަދި ބޮސްނިއާއަށް ދާން އެދޭ މީހަކަށް ޢަމަލީ ތަރުބިއްޔަތާއި އަދި އެތަނަށް ދިއުމުގެ ކުރިން ބޭނުންވާ އެނޫންވެސް އެހެން ތަރުބިއްޔަތުތައް ދެއްވުމަށް، 2 ހަފްތާގެ ކުރުމުއްދަތުގެ ތަރުބިއްޔަތު ޕްރޮގްރާމްތަކެއް ފެއްޓެވިއެވެ.

ޖަލުގެ ތޭރިތަކުގެ ފުރަގަހުން

އެއަށްފަހު، ޚުބަރުގައި ހިނގި ބޮމުގެ ޙަދިސާގެ ފަހުން، އެކަމުގައި ބައިވެރިވިކަމަށް ތުޙުމަތުކޮށް، އާލް ސުޢޫދުގެ ސަރުކާރުން ޝައިޚް ޔޫސުފް ހައްޔަރުކުރިއެވެ. އަދި ދައްމާމުގެ ރަސްމީ ޖަލުގައި ވަރަށް ބޮޑެތި އަނިޔާތައް ދިނެވެ. އަދި އެތަން ފެނުނު އަޚުން ބުނިގޮތުގައި، މީގެ ރަޙުމްކުޑަ ކޮންމެ އަނިޔާއަކަށްފަހު، ޝެއިޚް އެތަނުން ނެރެވެނީ ސްޓްރެޗަރެއްގެ މަތީގައެވެ. އެއީ ޗާބޫކުންނާއި އޮނު ނުވަތަ މުގުރުން އަނިޔާދެވުމަށް ފަހުގައެވެ. އަދި އެކަން ކުރިކަމަށް ޝެއިޚް އެއްބަސްވުމަށް މަޖުބޫރުކުރެވުނެވެ.

ޝެއިޚް ޔޫސުފް ވިދާޅުވިއެވެ. “ތަޙްޤީޤުތަކާއި އަނިޔާތަކުގައި ޖަލުގައި ދުވަސްތަކެއް ހޭދަކުރުމަށްފަހު، ޖަލުގެ އިސް ޑިރެކްޓަރާއި ބައްދަލުކޮށްދިނުމަށް އެދުނީމެވެ. އެއީ ބައެއް މުހިއްމު ކަންތައްތަކުގައި އެއްބަސްވުމަށެވެ. އޭނާ އެކަމަށް އެއްބަސްވިއެވެ. އަދި އަހަރެންގެ ގޮޅިން ނެރިގެންގޮސް، އެހެން ކޮޓަރިއަކަށް އެމީހުން އަހަރެން ގެންދިޔައެވެ. އެތަނުގައި ލައްޛަތީ ސޯފާއެއްގައި އިށީނީމެވެ. އަދި އޭގެ ފަހުން ޑިރެކްޓަރުގެ މޮޅު އޮފީހަށް އަހަރެން ގެންދެވުނެވެ. އޭނާ ވަށައިލައިގެން އޮފިސަރުން ތިއްބެވެ. އަހަރެން އެއްބަސްވާ ކޮންމެކަމެއް ލިޔުމަށްޓަކައި، ކޮންމެ މީހެއްގެ އަތުގައި ގަލަމަކާއި ނޯޓުފޮތެއް އޮތެވެ. އަހަރެން އެތަނުގައި ބޭންދިއެވެ. އެވަގުތު އަހަރެން ހުރީ މުޅިން ބިޑި އަޅުވާފައެވެ. ޖަލުގެ ޑިރެކްޓަރު އަހަރެންނަށް “ކަލޭ އެއްބަސްވާން އޮތީ ކޮންކަމެއްހޭ. ކުރިއަށް ގެންދާށޭ. އެއްބަސްވާށޭ.” ބުނެލިއެވެ.”

ޝެއިޚް ވިދާޅުވިއެވެ. “އަހަރެން ވަރަށް ދުރުގޮތަކަށް ބުނެލީމެވެ. “ބޮން ގޮއްވާލުމުގައި ބައިވެރިވި މީހުންނާއިމެދު ކަލޭމެންނަށް ލިބިފައިވާ މައުލޫމާތުތައް މަދުކަމުން، ކަލޭމެން ކުރިމަތިލާން ޖެހިފައިވާ އުނދަގޫ ޙާލަތު އަހަރެންނަށް އެނގެއެވެ. ކޮންމެގޮތެއްވިޔަސް، އެއްބަސްވުމުގެ އަގެއްގެ ގޮތުގައި އަހަރެންގެ ކަރު ދޭންޖެހުނުނަމަވެސް، ބޮމުގެ ޙަމަލާގެ ފަހަތުގައި އަހަރެންވާކަމަށް އެއްބަސްވާން އަހަރެން ބޭނުމެވެ.” އަހަރެން މިބަސް ބުނެ ނުނިމެނީސް، ޖަލު ޑިރެކްޓަރު، ސިގިރެޓު އަޅިކެނޑި އަހަރެންގެ މޫނުމައްޗަށް ހޫރާލިއެވެ. އަދި “އޭނަ ބޭރަށް ގެންގޮސް އަދަބުދޭށޭ” ބުނެލިއެވެ.”

ބޮމުގެ ޙަމަލާ ހިންގި މީހާ ފާޅުވުމަށް ﷲ އިރާދަކުރައްވައިފުމަށް ދާންދެން، އަދަބުދިނުމުގެ ސިލްސިލާ ކުރިއަށް ދިޔައެވެ. އަދި އެމީހަކީ ރާފިޟާ (ޝިޔަޢީ) އެއްކަން ފަހުން އެނގުނެވެ. އަދި އޭގެފަހުން ޝިޔަޢީންގެ އާޔަތުންނާއި ސައްޔިދުންނާއި އަދި އެނޫންވެސް ރާފިޟީންނާއެކު ޖަލުގައި ދުވަސްތަކެއް ޝައިޚް ހޭދަކުރެއްވިއެވެ. އަދި މިދުވަސްކުގައި އެމީހުންނާ ދެކޮޅަށް ރައްދުދެއްވާ، ޝައިޚްގެ ވަރުގަދަ ދަލީލުތަކުގެ ސަބަބުން އެމީހުން ތިބީ ވަރަށް ބޮޑަށް ނުރުހުންވެފައެވެ.

އެކަހެރިގޮޅިއާއި ޢިލްމު އުނގެނިވަޑައިގަތުން

އަދި އޭގެފަހުން ޢާއްމު ޖަލަކަށް ގެންދެވުނެވެ. އެތަނުގައި ސުންނަތުގެ އަހުލުވެރިންނާއި އެކުވުމުގެ ފުރުޞަތުލިބިލެއްވިއެވެ. މިގޮތުގައި ދުވަސްތަކެއް ހޭދަކުރުމަށްފަހު، ވަގުތުގެ ބޭނުން އެންމެ ފުރިހަމަގޮތުގައި ހިފުމަށްޓަކައި އަދި ﷲ އާއިއެކު އެކަނިވެ އެކަހެރި ވުމުގެ ބޭނުމުގައި، އެކަހެރި ގޮޅިއެއްގައި އޮންނެވުމަށްޓަކައި ބަނޑުހައިހޫނުކަމުގެ ހަޅުތާލެއް ފެއްޓެވިއެވެ. އަދި އެކަން ޙާޞިލްކުރައްވާ، އެކަހެރި ގޮޅިއެއްގައި ދޮޅު އަހަރު ނުވަތަ އެއަށްވުރެ އިތުރު މުއްދަތަކަށް އޮންނެވުމަށްފަހު ދޫކޮށްލެވުނެވެ. އަދި ޝައިޚް ވިދާޅުވާގޮތުގައި، އެކަހެރިގޮޅީގައި ހޭދަކުރި ދުވަސްތަކުގައި، ޖުނުބުވެގެން ފެންވެރުމަށްޓަކައި މެނުވީ އެއްވެސް ވަގުތެއް ލިބިވަޑައެއްނުގަނެއެވެ. އަދި ކުޑަ ވަގުތުކޮޅެއްގައި މެނުވީ ނިދިކުރައްވައެއް ނުހައްދަވައެވެ. އަދި ވަގުތާއި ވާދަޖައްސަވާ ކަމުގައިވެސް ވިދާޅުވިއެވެ.

އެކަހެރިގޮޅީގައި ވަގުތުތައް ހޭދަކުރެއްވީ، ޢިލްމުފޮތްތައް ހިތުދަސްކޮށް ކިޔުމުގައެވެ. އަދި ޤުރުއާން ހިތުދަސްކުރައްވާ އޭގެ ކުދިކުދި ތަފްޞީލްތަކަށް ދާންދެންވެސް އުނގެނިވަޑައިގެންވީ ބޭކަލަކުކަމުގައި ވެވަޑައިގަތެވެ. އަދި ދެ ޞަޙީޙްވެސް ހިތުދަސްކުރެއްވިއެވެ. އަދި ކޮންމެހެން ނިކުންނަން ޖެހިއްޖެ ޙާލަތެއްގައި މެނުވީ ޝައިޚް އިރުގެއަލިކަން ލިބިލެއްވުމަށް ނިކުމެވަޑައިގެން ނުއުޅުއްވައެވެ. އަދި ޝައިޚް ވިދާޅުވިކަމަށްވެއެވެ. “ﷲ ގަންދީބުނަމެވެ! އީމާންކަމުން ފުރިގެންވާ ދުވަސްތަކެއް އަހަރެން ކަޑައްތުކުރީމެވެ. އަދި އެލައްޛަތްތައް ދެނެވޮޑިގެންވަނީ ހަމައެކަނި ﷲ އެވެ.”