މި މައުޟޫޢު އަކީ ޚުދު އަޅުގަނޑުމެންގެ ތެރޭގައިވެސް ވަރަށް ހޫނުވެފައިވާ ބަޙުޘެއްކަން އެނގެ އެވެ. އަދި މިފަދަ ނާޒުކު ޢަމަލުތަކުގެ މައްޗަށް ދަނެގަންނަންޖެހޭ ޢިލްމަށް ޖާހިލުވުމުގެ ސަބަބުން ތަފާތު ފިތުނަތަކެއްގެ ހަލަބޮލިކަމެއް ފެތުރިފައިވާހިނދެއްގައި، މި ޚުލާޞާ – އެހެނަސް ފުރިހަމަ – ފަތުވާގެ ސަބަބުން، މިފަދަ ކަންކަމުގައި އަރައިފައިވާ ބައެއް އޮޅުންތަކަށް ޖަވާބެއް ލިބޭނޭކަމުގައި އުއްމީދުކުރަމެވެ.

މިފަތުވާގެ މައިގަނޑަކީ، މި މައްސަލައިގެ ޢާންމު ޙުކުމުގެ މައްޗަށް އަލިއަޅުވާލުމާއި ހުޅަނގުގެ ޤައުމުތަކުގެ މައްޗަށް މީގެ ސަބަބުން ކުރާނޭ އަޘަރުތަކެވެ. ކިޔުން ތެރިން ވިސްނަވަން ޖެހޭ ނުޤުތާއަކީ، މިފަތުވާއަކީ އިސްލާމްދީނާއި ދެކޮޅަށް ހަނގުރާމަކުރަމުންދާ، އަދި ޢަހްދެއްނެތް ހުޅަނގުގެ ޤައުމުތަކުގެ މައްޗަށް – ވަކިން ޚާއްޞަކޮށް އެމެރިކާއަށް – ދެއްވާފައިވާ ފަތުވާއެއްކަމެވެ. އެހެންކަމުން އެތަނެއްގެ ވެރިކަމުގެ ނިޡާމާއި ސިޔާސަތުގެ ސަބަބުން އިސްލާމީ ދައުލަތެއްގެ ދަރަޖަ ގެއްލިފައިވާ، އެހެނަސް މުސްލިމުންގެ ޢާންމުން ބައިބޯގިނަ – ދިވެހިރާއްޖެ އާއި މިފަދަ [އިސްލާމީ ދުނިޔޭގެ] – ޤައުމުތަކުގެ މައްޗަށް މިފަދަ ފަތުވާއެއް ބޭނުންކޮށް ޙުކުމެއް ނުނެރެވޭނޭކަމެވެ.

ވީމާ މިފަތުވާ ނަހަމަ ގޮތުގައި ބޭނުންކޮށް، ޙުރުމަތްތެރިވެގެންވާ މުސްލިމުންގެ މުދަލަށް އަރައިގަތުމުގެ ފިތުނައިގެ މައްޗަށް ރައްކާތެރިވެ ތިބުމަށް އަހަރެމެން އިލްތިމާސް ކުރަމެވެ.