1- ދޫ އަހަރެމެންނަށް އަންގައިދޭނެއެވެ: އަހަރެމެން ނުބައި ވާހަކަ ދައްކާނަމަ، ޣީބަ ބުނާނަމަ އަދި ނުބައިކަން ބޮޑު އަނގަތަކުގައި ބައިވެރިވާ ނަމަ އޭގެން ދައްކުވައިދެނީ ކަންބޮޑުވުން ވަރަށް ކުޑަކަމެވެ. އަހަރެމެންގެ ދޫ ﷲ ތަޢާލާ ހަނދުމަކުރުމުގައި މަޝްޣޫލުކުރަންޖެހޭނެ އެވެ. ޤުރުއާން ކިޔެވުމުގައާއި އަދި ޢިލްމުގެ މަޖިލީސްތަކުގައި ބައިވެރިވުމުގައެވެ.
2- އެހެނިހެން މުސްލިމުންނާއި މެދުގައި ހިތުގައި އޮންނަ ރުޅިވެރިކަމާއި، ހަސަދަވެރިކަމާއި އަދި ޢަދާވާތްތެރިކަން ނައްތާލާ، ހެޔޮކޮށް ދެކުމާއި އަޅާލުމަށް ބަދަލުކުރަންޖެހޭނެއެވެ.
3- އަހަރެމެންގެ ބަނޑަށް ލެވޭ އެއްޗެކާއިމެދުގައި ސަމާލުވާންޖެހޭނެއެވެ.
4- ޙަރާމް ތަކެއްޗަށް ބެލުމުގައި އަހަރެމެންގެ ލޯ އަމާޒުކޮށްގެން ނުވާނެއެވެ.
5- އަހަރެމެންގެ ފައި ޙަރާމް ތަންތަނާއި ދިމާލަށް ގެންގޮސްގެން ނުވާނެއެވެ.
6- ޙަރާމް ބޭނުންތަކަށް އަހަރެމެންގެ އަތް ދިއްކޮށްގެން ނުވާނެއެވެ.
7- ހެޔޮ ޢަމަލު ކުރުމުގައި، އެ ޢަމަލުތައް ކުރެވެނީ ﷲ ތަޢާލާ ފިޔަވައި އެހެން ފަރާތަކަށް ނޫންކަމާއި މެދުގައި ސަމާލުވާންޖެހޭނެ އެވެ.
ﷲތަޢާލާއަށް ބިރުވެތިވާންޖެހޭ ސަބަބުތައް:
އޭ ﷲގެ އަޅުތަކުންނޭވެ! ﷲ ތަޢާލާއަށް އަހަރެމެން ބިރުވެތި ވާންޖެހެނީ ކީއްވެކަމުގެ ވަރަށް ގިނަ ސަބަބުތައް ވެއެވެ. ތިރީގައި މިވަނީ އޭގެ ތެރެއިން ބައެއް ސަބަބުތަކެވެ.
1- ތައުބާވުމުގެ ކުރިން މަރުވުމުގެ ބިރު.
2- ތައުބާއާއި އެއްގޮތަށް ނޫޅެވުމާއި ވަޢުދާއި ޚިލާފްވެވުމުގެ ބިރު.
3- ﷲ ތަޢާލާއަށް އަދާކުރަންޖެހޭ ވާޖިބުތައް އަދާނުކުރެވިދާނެ ކަމުގެ ބިރު.
4- ހިތުގެ މަޑުކަން ނެތިގެން ދިއުމާއި ހިތް ހަރުވުމުގެ ބިރު.
5- އެއްގޮތެއްގައި ނުހުރެވުމުގެ ބިރު.
6- އެދުންވެރިކަން ގަދަވެގަނެފާނެ ކަމުގެ ބިރު.
7- ފަޚުރުވެރިކަމުގެ ސަބަބުން ހެޔޮ ޢަމަލު ކުރުމުން އެކަމަށް ﷲތަޢާލާގެ ހަޟްރަތުގައި ޒިންމާ ވާން ޖެހުމުގެ ބިރު.
8- ގިނަ ގުނަ ނިޢުމަތްތަކުގެ ސަބަބުން ކިބުރުވެރިވެ ބޮޑާވެދާނެ ކަމުގެ ބިރު.
9- އެހެނިހެން މަޚްލޫޤާތުގެ ސަބަބުން ﷲ ތަޢާލާ އާއި ދުރުވެދާނެ ކަމުގެ ބިރު.
10- އާދަޔާ ޚިލާފު ނިޢުމަތްތަކުގެ ސަބަބުން ނުބައި ނިމުމެއް އަތުވެދާނެ ކަމުގެ ބިރު.
11- އަވަހަށް (މިދުނިޔޭގައި) ޢަޒާބު ދެއްވަފާނެކަމުގެ ބިރު.
12- މަރުވާ ވަގުތުގައި ނިކަމެތިކުރެވިދާނެ ކަމުގެ ބިރު.
13- ދުނިޔެވީ ޒީނަތުގެ ސަބަބުން ހެއްލެނިވެދާނެ ކަމުގެ ބިރު.
14- ހަނދާންނެތިފައިވާ ދަނޑިވަޅެއްގައި ﷲ ތަޢާލާ އެމީހެއްގެ ސިއްރު ހާމަކުރައްވަފާނެ ކަމުގެ ބިރު.
15- މަރުގެ ވަގުތުގައި ނުބައި ގޮތަކަށް މަރުވެދާނެ ކަމުގެ ބިރު.
16- މަރުގެ ސަކަރާތުގެ ބިރު.
17- މުންކަރު އަދި ނަކީރު ކައްވަޅުގައި ކުރައްވާނެ ސުވާލުތަކުގެ ބިރު.
18- ކައްވަޅުގެ ޢަޒާބުގެ ބިރު.